Cyber Awareness – takim i hapur me studentët e Universitetit të Tiranës
October 27, 2022
BiblioTech
December 10, 2022
Në kuadër të projektit “Cyber security and data protection awareness in Albania” (Rritja e Ndërgjegjësimit për Sigurinë Kibernetike dhe Mbrojtjen e të Dhënave Personale), Qendra Shqiptare për një Zhvillim të Qëndrueshëm (ASDO) në bashkëpunim me Universitetin e Tiranës, dhe me mbështetjen e Ambasadës Zvicerane në Shqipëri, në datë 31 tetor 2022, organizuan leksionin e hapur me temë:
Ndërgjegjësimi për sigurinë kibernetike dhe shkeljen e të dhënave personale për studentët e Universitetit të Tiranës
Lektorët e ftuar për të ndarë informacione dhe këshilla me pjesëmarrësit ishin Dr. Eyal Pinko, znj. Blerta Xhako dhe z. Saimir Kapllani. Në këtë aktivitet morën pjesë, profesorë dhe më shumë se 80 studentë nga fakultete të ndryshme të Universitetit të Tiranës, si Fakulteti i Ekonomisë, Fakulteti i Drejtësisë, Fakulteti i Shkencave Sociale, Fakulteti i Shkencave të Natyrës etj.
Z. Saimir Kapllani, Përgjegjës i Sektorit të Kontrollit në Autoritetin Kombëtar për Certifikimin Elektronik dhe Sigurinë Kibernetike, (AKCESK) në prezantimin e tij u ndal në kuadrin ligjor të sigurisë kibernetike në Republikën e Shqipërisë. Ai prezantoi mekanizmat që përdor Autoriteti për sigurinë e fëmijëve, të rinjve dhe publikut të gjerë në hapësirën kibernetike si dhe theksoi rëndësinë e forcimit të bashkëpunimit kombëtar dhe ndërkombëtar në fushën e sigurisë kibernetike me partnerët strategjikë.
Më tej Dr. Eyal Pinko, profesor dhe kërkues në në fushën e Mbrojtjes dhe Sigurisë Kibernetike në Universitetin Bar-Ilan, Izrael, diskutoi në një kontekst global disa nga temat më të nxehta aktuale të sigurisë kibernetike.
Dr. Pinko nënvizoi se:
Bota po ndryshon me një shpejtësi marramendëse…e ardhmja do të jetë e përqendruar në mjedisin digjital, duke patur gjithçka të lidhur në një rrjet ndaj edhe ne do të varemi prej tij…Prandaj njerëzit duhet të tregojnë kujdes sidomos me tre elemente që konsiderohen më në rrezik: paratë, të dhënat shëndetësore dhe sistemi i edukimit.
Së fundmi, Znj. Blerta Xhako, Drejtore e Drejtorisë së Çështjeve Juridike dhe Integrimit pranë Zyrës së Komisionerit për të Drejtën e Informimit dhe Mbrojtjen e të Dhënave Personale informoi pjesëmarrësit si funksionon struktura e Komisionerit, procedurat e ankimimit, në rastet e cënimit të të drejtave personale dhe të drejtat që gëzojnë njerëzit lidhur me mbrojtjen e të dhënave personale. Për më tepër znj. Xhako prezantoi risitë në legjislacionin e vendit dhe harmonizimin e tij me acquis në këtë fushë, harmonizim i mundësuar nëpërmjet një projekti binjakëzimit të financuar nga programi i BE-së IPA 2017. Për më shumë informacion mbi procedurat e ankimimit klikoni në linkun si vijon: https://www.pyetshtetin.al/ .
Aktiviteti u ndoq me një interes të madh bazuar, nga numri i lartë i pjesëmarësve, përfshirja aktive e tyre gjatë sesionit të pyetjeve dhe përgjigjeve, si dhe nga përgjigjet e marra nga pjesëmarrësin në formularët e vlerësimit të aktivitetit.
Një falënderim për mundësinë e zhvillimit të këtij leksioni të hapur i shkon Universitetit të Tiranës dhe ekspertëve.
Materialet e leksionit të hapur mund të gjenden në librarinë elektronike të Universitetit të Tiranës linku si më poshtë:
https://unitir.edu.al/trajnimi-ndergjegjesimi-per-sigurine-kibernetike-dhe-shkeljen-e-te-dhenave-personale-per-studentet-e-universitetit-te-tiranes-date-31-10-2022-ora-1200-1410/
