Certifikimi, Standardet e Punës dhe Migrimi i Rregullt në Fokusin e Ekonomisë Shqiptare

Tiranë, 13 qershor 2025 – Në ambientet e Dhomës Kombëtare të Zejtarisë u zhvillua një takim tematik i rëndësishëm mbi rolin e certifikimit, standardeve të punës dhe migrimit të rregullt si nxitës të zhvillimit ekonomik dhe gjithëpërfshirjes në tregun e punës. Aktiviteti u organizua në bashkëpunim me Inspektoratin Shtetëror të Punës dhe Organizatën për Zhvillim të Qëndrueshëm në Shqipëri (ASDO), duke mbledhur përfaqësues të institucioneve publike dhe aktorë nga sektori i kozmetikës dhe zejtarëve në vend.

Në takim morën pjesë emra të njohur të fushës si Z. Luan Bregasi, President i Biznes Albania; Z. Eljo Muçaj, Kryeinspektor i Inspektoratit të Punës; Z. Koli Sinjari, Sekretar i Përgjithshëm i Dhomës Kombëtare të Zejtarisë; dhe znj. Ada Ilia, Drejtoreshë Ekzekutive e ASDO.

Gjatë takimit, z. Bregasi vuri në dukje rëndësinë strategjike të zejtarëve dhe mjeshtërve në strukturën ekonomike të vendit dhe nevojën për një treg pune të formalizuar, me profesionistë të certifikuar.

Nga ana e tij, z. Muçaj theksoi rëndësinë e punës së denjë si një domosdoshmëri për zhvillim të qëndrueshëm, duke përmendur gjithashtu rëndësinë e inspektimeve gjithëpërfshirëse edhe në sektorin e kozmetikës dhe zejtarisë.

Ndërsa z. Sinjari nënvizoi angazhimin e Dhomës për njohjen zyrtare të aftësive mjeshtërore përmes certifikimit, si një mjet për integrim të plotë në tregun e punës.

Migracioni i Rregullt në Qendër të Diskutimit

Një dimension i veçantë iu shtua takimit nga fjala e znj. Ada Ilia, e cila solli në vëmendje sfidat dhe mundësitë që sjell migracioni i rregullt në tregun shqiptar të punës. Vetëm në vitin 2024, mbi 13,000 punëtorë të huaj kanë marrë leje pune në Shqipëri, duke ndihmuar sektorë strategjikë si ndërtimi, bujqësia, turizmi dhe estetika.

Megjithatë, jo në pak raste, në marrëdhëniet e tyre të punës hasen elementë të rëndësishëm informaliteti, si mungesa e një kontrate të rregullt pune, kushte jo të denja apo të pasigurta, përfshirë dhe mungesën e mbrojtjes ligjore aty ku është e nevojshme.

Në këtë kuadër, ASDO në partneritet me GIZ Albania ka ndërmarrë një sërë iniciativash konkrete:

• Paketa informuese në shtatë gjuhë për punëtorët migrantë;
• Trajnime për inspektorët e punës mbi mbrojtjen e grupeve në rrezik dhe etikën profesionale;
• Fushata ndërgjegjësimi për migrimin e rregullt dhe të sigurt;
• Seanca këshillimi në 19 bashki në të gjithë vendin;
• Rekomandime ligjore për përmirësimin e kuadrit mbi punësimin dhe migracionin.

“Përmirësimi i standardeve të punës ndihmon jo vetëm migrantët, por gjithë ekonominë – duke garantuar etikë, siguri dhe zhvillim të qëndrueshëm,” – theksoi znj. Ilia.

Në përmbyllje, takimi konfirmoi se garantimi i kushteve dinjitoze të punës, në përputhje me standardet kombëtare dhe ndërkombëtare, kërkon një angazhim të vazhdueshëm për bashkëpunim ndërinstitucional dhe përfshirjen aktive të sektorit privat. Vetëm përmes këtij bashkëpunimi mund të ndërtojmë një treg pune më të formalizuar, më të barabartë dhe më të sigurt për të gjithë punëmarrësit.

Gjatë diskutimeve u theksuan disa prioritete të përbashkëta, të cilat përbëjnë bazën për një treg pune më të drejtë dhe të qëndrueshëm. Ndër to, një rëndësi të veçantë zë certifikimi dhe njohja zyrtare e profesionistëve, si një hap i domosdoshëm drejt rritjes së cilësisë dhe besueshmërisë në tregun e punës. Po ashtu, u nënvizua nevoja për përmirësimin e kushteve të punës në çdo sektor, duke synuar garantimin e një mjedisi pune të sigurt dhe dinjitoz për të gjithë. Një tjetër aspekt i rëndësishëm është trajtim i barabartë për punëtorët migrantë dhe ata vendas, si dhe forcimi i etikës dhe i standardeve të sigurisë në vendin e punës, që mbetet thelbësor për zhvillimin e një kulture pune të përgjegjshme dhe gjithëpërfshirëse. ASDO rikonfirmoi rolin e saj si urë bashkëpunimi mes institucioneve publike dhe sektorit privat, duke mbështetur politika të mençura dhe të drejta që fuqizojnë punëtorin dhe rrisin mirëqenien ekonomike të vendit.