Dita e Mentorimit në GIR Albania: Nga Financat dhe Inovacioni tek Sipërmarrja dhe Zhvillimi i biznesit, praktikat më të mira për Start Up-et shqiptare

Programi Get In the Ring (GIR) Albania zhvilloi me sukses më datë 17 shtator 2025, pranë Innovation Hub tek Piramida, Tiranë, Ditën e Mentorimit, një aktivitet i dedikuar për fuqizimin e start-up-eve pjesëmarrëse në këtë edicion. Aktiviteti solli bashkë mentorë të mirënjohur nga Shqipëria dhe vende të ndryshme të botës, të cilët ndanë përvojën dhe ekspertizën e tyre për të ndihmuar themeluesit e rinj të zhvillojnë strategjitë e duhura dhe të përshpejtojnë rrugëtimin e tyre drejt rritjes.

Start-upet patën mundësinë të mentoroheshin, udhëzoheshin dhe frymëzoheshin nga:

Ermira Shyti, Eksperte me përvojë në Menaxhimin e Burimeve Njerëzore, Sigurimin e Cilësisë dhe Arsimin, Drejtuese e komponentit të karrierës, në Helvetas (projekti RisiAlbania), mbeshtetws kryesor i GIR Albania 2025

Elias Mazloum, sipërmarrës social dhe konsulent ndërkombëtar nga Libani

Gerhard Veizi, sipërmarrës nga Shqipëria, themelues i nismave në ekonominë qarkulluese, inovacionin ushqimor dhe industrinë kulturore

Denis Alizoti, profesionist përkushtuar në fushwn e edukimit, kordinator I Projekteve nw Junior Achievement Albania 

Geart Ferhati, Fitues i Edicionit të Parë në Get in the Ring Albania 2024

Daniela Haxhi, Drejtor i Transformimit Digjital në Ministrinë e Ekonomisë dhe Inovacionit

Rose-Marie Henny, Profesioniste zvicerane me eksperiencë të gjerë në ndihmën humanitare, bashkëpunimin ndërkombëtar dhe zhvillimin organizativ

Këta profesionistë të fushave të ndryshme, nga financat dhe inovacioni tek sipërmarrja dhe zhvillimi i biznesit, ndanë praktikat më të mira dhe eksperiencat e tyre personale mbi ndërtimin e bizneseve të suksesshme.

Fokus mbi rritjen e qëndrueshme

Dita e Mentorimit u ndërtua mbi sesione një-me-një dhe punë në grupe, ku start-upet morën feedback praktik mbi modelet e biznesit, marketingun digjital, menaxhimin financiar dhe përgatitjen për investime. Për shumë prej tyre, kjo përvojë u kthye në një pikë kthese për të qartësuar vizionin, përmirësuar ofertën e tyre dhe për t’u përgatitur më mirë për tregun dhe investitorët.

Një ekosistem që bashkon

Përveç njohurive praktike, Dita e Mentorimit shërbeu edhe si një hapësirë rrjetëzimi, ku start-upet u lidhën drejtpërdrejt me mentorët, por edhe me aktorë të tjerë të ekosistemit të inovacionit në Shqipëri. Ky bashkëpunim i ngushtë është thelbësor për ndërtimin e një kulture sipërmarrëse që promovon inovacionin, bashkëpunimin dhe rritjen e qëndrueshme.